Liverpool ប្ដេជ្ញាយ៉ាងមុតមាំ ក្នុងទីផ្សារដោះដូរកីឡាករនារដូវក្តៅខាងមុខនេះ។ យោងតាមប្រភពដែលជិតស្និទ្ធនឹងក្លឹប បានឱ្យដឹងថា ក្រុមហង្សក្រហម មានឆន្ទៈក្នុងការបោះទន់ ៣០០លានអឺរ៉ូ ដើម្បីចុះហត្ថលេខាលើកីឡាករកម្រិតកំពូលបីរូប។

ផ្នែកគ្រប់គ្រងកីឡានៅ Anfield មានគោលបំណងយ៉ាងច្បាស់លាស់ និងបានកំណត់គោលដៅលើ Julián Álvarez, Xavi Simons និង Alessandro Bastoni ។

គោលដៅចម្បងរបស់ Liverpool គឺ Julián Álvarez ខ្សែប្រយុទ្ធមកពី Atlético Madrid ។ លក្ខខណ្ឌបញ្ចប់កុងត្រារបស់កីឡាករសញ្ជាតិអាហ្សង់ទីន ត្រូវបានកំណត់តម្លៃ ១៥០លានអឺរ៉ូ គឺជាចំនួនដែលក្លឹបអង់គ្លេស ត្រៀមនឹងចំណាយ ដើម្បីធានាការមកដល់របស់គាត់ រួចទៅហើយ។

ខ្សែបម្រើក៏ជាតំបន់មួយផ្សេងទៀតដែល Liverpool មានបំណងពង្រឹង ហើយ Xavi Simons គឺជាកីឡាករដែលត្រូវបានជ្រើសរើស។ បច្ចុប្បន្នកំពុងខ្ចីជើងនៅ RB Leipzig ពី PSG ការផ្ទេររបស់គាត់អាចត្រូវបានបញ្ចប់ក្នុងចំនួនទឹកប្រាក់ជិត ៧៥លានអឺរ៉ូ។

ឈ្មោះទីបីក្នុងបញ្ជី គឺ Alessandro Bastoni ដែលជាខ្សែការពាររបស់ Inter Milan។ ជាមួយនឹងតម្លៃប៉ាន់ស្មាន ៧៥លានអឺរ៉ូ ដែលកីឡាករសញ្ជាតិអ៊ីតាលីរូបនេះ ត្រូវបានគេមើលឃើញថា ជាផ្នែកមួយដ៏សំខាន់ក្នុងការពង្រឹងតំបន់ការពាររបស់ Anfield៕