ប្រធានក្លឹប Barcelona ត្រូវបានគេរាយការណ៍ថា កំពុងតែព្រួយបារម្ភយ៉ាងខ្លាំងចំពោះកីឡាករវ័យក្មេងឆ្នើម Lamine Yamal បន្ទាប់ពីមានភាពចម្រូងចម្រាសជាច្រើននៅរដូវក្តៅនេះ។

Yamal បានវិលត្រឡប់មកហ្វឹកហាត់ជាមួយ Barcelona កាលពីថ្ងៃអាទិត្យ ក្រោមភាពស្រពិចស្រពិល ខណៈដែលរដ្ឋាភិបាលអេស្ប៉ាញបានទាមទារឱ្យមានការស៊ើបអង្កេតលើពិធីខួបកំណើតគម្រប់ ១៨ ឆ្នាំរបស់គេកាលពីចុងសប្តាហ៍។

តារាឆ្នើមរបស់ Barcelona និងអេស្ប៉ាញរូបនេះ ត្រូវបានគេរិះគន់យ៉ាងទូលំទូលាយចំពោះពិធីជប់លៀងអបអរសាទរដែលត្រូវបានចោទប្រកាន់ថាបាន "កេងប្រវ័ញ្ចលើមនុស្សតឿ" និងមានលក្ខណៈពិសេស "ស្ត្រីដែលមានទំហំដើមទ្រូងធំ" ដែលត្រូវបានគេអះអាងថា ត្រូវបានបង់ប្រាក់ឱ្យចូលរួម។

កាលពីថ្ងៃអង្គារ រូបភាពថ្មីៗនៃបុគ្គលដែលមកដល់ព្រឹត្តិការណ៍ឯកជននោះ ត្រូវបានគេទទួលបាន ហើយបានបង្ហាញក្រុមបុរស ៥ នាក់ដែលមានជំងឺ Achondroplasia (មនុស្សតឿ) ខណៈដែលពួកគេហាក់ដូចជាកំពុងចុះឈ្មោះចូលរួមពិធីជប់លៀង។

រូបភាពមួយទៀតបង្ហាញស្ត្រីមួយចំនួន បន្ទាប់ពីឆ្លងកាត់ប៉ុស្តិ៍ត្រួតពិនិត្យនោះ ខណៈដែលពួកគេហាក់ដូចជាកំពុងឆ្ពោះទៅកាន់ទីកន្លែងសំខាន់។ លើសពីនេះ នៅក្នុងរូបភាពដែលត្រូវបានថតនៅពេលយប់ ភ្ញៀវជាច្រើនអាចត្រូវបានគេឃើញមកដល់សម្រាប់កម្មវិធីដ៏អស្ចារ្យនេះ។

ព្រឹត្តិការណ៍ "ម៉ាហ្វៀ" ដ៏អធិកអធមរបស់ Yamal ដែលប្រារព្ធធ្វើឡើងនៅទីតាំងឯកជនមួយ ត្រូវបានគេរាយការណ៍ថា មានមនុស្សប្រមាណ ២០០ នាក់ចូលរួម រួមទាំងមិត្តរួមក្រុម Barcelona របស់គេដូចជា Robert Lewandowski, Alejandro Balde និង Gavi ផងដែរ៕